Uprkos ranom rezultatskom zaostatku, "sokolići“ su došli do zaslužene pobjede.
Po dva gola postigli su Luka Vušurović i Nikola Vukoje, dok je strijelac za Letoniju bio Zahars Maligins.
"Nešto lošije smo ušli u meč, a po ko zna koji put smo primili gol nakon našeg kornera. Nakon toga zaigrali smo bolje, napadali protivnika konstantno i postigli dva gola do poluvremena, uz to imali još nekoliko izglednih prilika za postizanje gola. U drugom dijelu nastavili smo u visokom presingu na polovini protivnika i postigli još dva gola za konačan rezultat", kazao je selektor Minja Ljumović.
Selektor je rekao i da je turnir bio koristan za njegov tim.
"I danas je bilo dosta nekih tehničkih grešaka u svim linijama tima, ali tek smo na samom početku i ne čudi takav splet okolnosti. Na kraju, ovaj turnir nam je pokazao da sa jačim timovima kao što je to Poljska i najmanja greška je kažnjiva, a pritom svaku svoju priliku morate pretvoriti u gol, kako bismo mogli da pariramo takvim protivnicima", rekao je Ljumović.
