Dva puta na susretu Golubovčani su vodili dva razlike 0:2 i 1:3, ali uporni tim predvođen Miljanom Radovićem je došao do željenog rezultata i nova tri boda. Šef struke u nikšićkom sastavu imao je razloga za zadovoljstvo poslije fenomenalne utakmice i preokreta. Ipak, ono što treba analizirati, prema riječima Radovića, jesu greške koje su njegovi igrači napravili u prvom poluvremenu, poslije kojih je Zeta postigla dva laka pogotka.
“Kada napravite neke greške i iz toga primite onakve golove znali smo da u drugom poluvremenu ne može toliko da nas ne ide. To je bio razlog da se dogovorimo da idemo srcem, onako kako je Sutjeska oduvjek radila i što treba da radi. Stalno govorim momcima da imaju veliki kvalitet, ali samo sa vjerom u sebe. Ako ne ide jedan ili nekoliko pasova, sigurno će doći dobar pas ako vjeruju u to. Igrači su pokazali ono što stalno pričamo, da smo se dobro pripremili. Ovo je jedna izuzetna pobjeda, daje nam dosta elana za neke druge stvari”, rekao je Radović.
Dvostruki strijelac na meču Nikola Janjić je istakao da je Sutjeska više željela pobjedu od protivnika, te da je konačan rezultat to i pokazao.
“Imamo najveći kvalitet u ligi, moraćemo to da cijenimo, a danas smo željeli pobjedu i došli smo do nje”, kazao je Janjić.
Nakon 23 odigrane utakmice Sutjeska je druga na tabeli u domaćem šampionatu sa 38 osvojenih bodova.
