Prvih pola sata na stadionu pod Golubinjom proteklo je bez većih uzbuđenja i u tom dijelu igre viđena je po jedna poluprilika na obje strane. Nakon toga je u 31. minutu na odbijenu loptu nakon slobodnog udarca odlično reagovao rezervista Bojan Ciger koji svojim prvim golom u plavom dresu donosi prednost aktuelnom šampionu.
Nikšićani su nakon gola dobili na samopouzdanju i do odlaska na odmor stvorili još par prilika, a i domaći fudbaleri su jednom zaprijetili golu Giljena ali se rezultat do kraja prvog dijela igre nije mijenjao.
U drugom poluvremenu Pljevljaci su od starta vršili pritisak koji je urodio plodom u 63. minutu, kada je Đalović iskoristio priliku i donio poravnanje. Samo minut prije ovog pogotka šansu za gol imao je Božo Marković, ali se nije najbolje snašao u šesnaestercu protivnika.
Nastavak igre donio je kišu, ali i mnogo jači tempo jer su oba tima željela da dođu do sva tri boda. U 71. minutu glavom je nakon kornera pokušao Darko Bulatović, ali je lopta otišla u korner. Do kraja susreta je viđeno još nekoliko šansi, a najbolju je imao Bubanja nakon dodavanja Bulatovića u 85. minutu, ali se rezultat nije mijenjao do kraja.
Sutjeska sa 43 osvojenih bodova ostaje na liderskoj poziciji, a u narednom kolu koje je na programu 9. marta, igraće kraj Bistrice protiv Iskre.
U ostalim susretima 22. kola koji su odigrani danas postignuti su sljedeći rezultati:
OFK Titograd - Zeta 0:2
Budućnost - Lovćen 7:0
Petrovac - Mornar 2:1
Iskra - Grbalj 1:1
