Tokom ove godine zdravstveni inspektori Uprave za inspekcijske poslove kontrolisali su 101 zdravstvenu ustanovu, 34 javne i 67 privatnih, i utvrdila 16 nepravilnosti.
Zbog utvrđenih nepravilnosti u dvije privatne zdravstvene ustanove inspektori su zabranili izdavanje ljekarskih uvjerenja, kazali su Dnevnim novinama iz Uprave i dodali da je izrečeno i osam ukazivanja i četiri rješenja, te izdato pet prekršajnih naloga u oznosu od 1.900 eura.
“Zdravstvena inspekcija je u 2020. godini kontrolisala 101 zdravstvenu ustanovu, od kojih je kontrolisano 25 apoteka. Kontrolisane su 34 javne zdravstvene ustanove i 67 privatnih zdravstvenih ustanova, među kojima Klinički centar Crne Gore (u okviru njega različita odjeljenja), opšte bolnice, veledrogerije i veliki broj javnih i privatnih apoteka”, kazali su Dnevnim novinama iz Uprave.
Inspektori su, objašnjavaju iz Uprave, kontrolisali ispunjenost propisanih uslova u pogledu prostora, kadra, opreme, vođenje medicinske dokumentacije, evidencije, izdavanje ljekova na recept, izdavanje ljekarskih uvjerenja, dopunski rad zdravstvenih radnika u zdravstvenim ustanovama, isticanje odluke o određivanju zaštitnika prava pacijenata i drugo.
“Zdravstvena inspekcija je utvrdila 16 nepravilnosti koje su se odnosile na: nevođenje medicinske dokunentacije u skladu sa zakonom, nemanje dokumentacije u momentu pregleda, izdavanje ljekarskih uvjerenja suprotno zakonu”, pojasnili su iz Uprave.
Od 1. januara do 25. maja, kako su precizirali, izvršen je 101 inspekcijski pregled u kojem je utvrđeno 16 nepravilnosti, za čije otklanjanje su izrečene upravne mjere osam ukazivanja i četiri rješenja, dok je za počinjene prekršaje izdato pet prekršajnih naloga u oznosu od 1.900 eura.
“U dvije privatne zdravstvene ustanove Zdravstvena inspekcija je zabranila obavljanje određenih poslova pružanja zdravstvene zaštite zaposlenih izdavanje ljekarskih uvjerenja”, istakli su iz Uprave.
Zdravstveni i sanitarni inspektori, naglašavaju, od početka proglašenja epidemije dali su veliki doprinos vršeći kontinuiran i pojačan nadzor putnika na graničnim prelazima, kao i izdavanjem Rješena o samoizolaciji za oboljele i kontakte sa oboljelim, otpuštanje lica iz karantina, kontrole poštovanja samoizolacije sa Upravom policije.
“Od 4. maja vršen je pojačani nadzor u dijelu poštovanja mjera Naredbi u objektima pod sanitarnim nadzorom i zdravstvenim ustanovama”, kazali su iz Uprave za inspekcijske poslove.
