Kako su Dnevnim novinama kazali pojedini prodavci drva, cijena zavisi od vrste drveta, kao i da li je to drvo išegano i iscijepano ili je u balvanima.
Kako ističu, kiša koja svakih par dana padne, ometa ih u branju.
“Metarska drva, bukova, koštaju od 37 do 40 eura, dok su klocevi, barem kod mene, 43 eura. Cijepana drva su najskuplja, ona su od metra 46 eura. Ljudi dolaze svakodnevno, veliko je interesovanje. Međutim, drva nemamo puno, svaki treći dan pada kiša pa nas to ometa u branju, jer po kiši rada nema”, kazao je jedan od prodavaca.
Prema njegovim riječima, najveća potražnja je za bukovim drvima jer, kako ističe, od pet metara debljih bukovih drva, kad se iscijepaju, ispadne i do šest i po metara, te je stoga bukovina najisplativija.
“Cerova drva su kvalitetnija i skuplja, dobra izlaze na 40 eura. Međutim, narod se najviše interesuje za bukovinu, jer im se najviše isplati. Recimo, od dobre, debele bukovine od pet metara, dobije se i do šest i po metara. Nije to mala ušteda”, kazao je on Dnevnim novinama.
